Ek is gebore in die klein dorpie Bedford in die Oos-Kaap, en het my hoërskoolloopbaan voltooi aan DF Malan in Bellville. Daarna het ek na Stellenbosch verhuis om my studies voort te sit, waar ek my BSc-graad aan die Universiteit van Stellenbosch voltooi het – en 'n Stellenbosser geword het in hart en siel.

My loopbaan het by Niervoorbij begin, en ek het later aangesluit by die Departement van Biochemie aan US. Dit is egter eers toe ek ’n mamma geword het, dat my lewenspad werklik vorm begin aanneem het – en 'n nuwe roeping het gebore geraak.

Met twee klein seuns van onderskeidelik drie jaar en nege maande, het ek in 1990 Kabouterland begin – aanvanklik as 'n tydelike oplossing vir my eie kinders se versorging. Ses kabouters het daardie eerste groep gevorm. Ek het nooit kon droom wat God in gedagte gehad het nie.

In 1997, ná die geboorte van my derde seun, het ons die deure van die huidige Kabouterland-gebou geopen – ’n werklikheid wat spruit uit geloof, volharding, en gehoorsaamheid. My vierde seun is in 2001 gebore, en ek is vandag die dankbare mamma van vier wonderlike seuns en ’n hele gemeenskap vol kabouterkinders wat ek met liefde mag versorg.

Kabouterland is nie net ‘n skool nie – dit is ’n roeping, ’n bediening en ’n plek waar kinders elke dag met liefde en genade ontvang word.

Ek is Kim Wiese. Ek is in Windhoek gebore en het in Hermanus gematrikuleer. Ek het in 2000 my Educare-kwalifikasie aan Boland Kollege voltooi en dadelik by Kabouterland begin werk met ’n Engelse groepie.

Ek is getroud en het twee pragtige dogtertjies wat my wêreld vul. Ek is nie bang om my mening te gee nie, en bring graag ’n bietjie pret en energie saam waar ek ook al gaan! Ek dink ek het ’n verslawing aan skoene en parfuum – maar deesdae kom dit tweede ná inkopies vir my gesin.

Ek is trots daarop om deel te wees van Kabouterland en elke dag saam met ons kinders en personeel te groei.